獺祭的經典日劇元素

Jun 07, 2024

獺祭的經典日劇元素

最近買咗好多本有關酒既書, 所以要執執書櫃, 長年無睇既, 要讓返啲吉位出嚟. 搵搵吓, 見到兩本有關獺祭既書. 我買既時候, 都未讀Level 3, 亦未讀日本酒, 只係剛剛識得”獺祭”哩個名. 感覺幾好飲, 啱啱又有書寫佢, 就買嚟當故事睇吓.

我依稀記得, 獺祭有段時間好fashion, 突然冒起得好快. 我老友Alan當時介紹俾我, 問我有無飲過“賴”祭. 我糊裡糊塗, 又跟住佢有邊讀邊 - “賴”祭. 事後先發現, 笑咗!!! 講起Alan, 佢係Sake迷, 有次我係奈良唔知飲咩, WhatsApp佢問問, 佢介紹風の森, 依家變咗我既flavour.

揭返哩兩本書, 原來自己當時做咗好多筆記. 依家睇返, 感受深咗好多, 可能人年紀大咗, 閱歷多咗.

兩本書作者唔同, 但初版時間差不多, 都係2018年. 櫻井博志係老闆, 以第一身執筆, 似自傳, 好直接, 但好多野唔講. 勝谷誠彥係作家, 佢識咗櫻井好耐, 以第三者視野去寫, 反而講多好多野, 感覺更加有趣味.

點解我會提起日劇? 因為櫻井博志成就獺祭既過程, 似足好多經典日劇入面既元素. 哩類劇我最鍾意睇, 例如天皇的御廚, 木村套摘星廚神, 下町火箭, 阿政與愛莉等等… 其中阿政與愛莉最接近, 因為哩套清晨劇又係講酒, 以日本威士忌之父 - 竹鶴政孝一生做藍本.

用咩形容詞去形容櫻井? 奮鬥, 勤力, 上進, 堅毅, 忘我, 無私, 耐性, 遠見, 熱情, 深刻, 認真, 決心, 才能, 加埋孝順. 哈哈, 孝順又關事? 係呀, 我讀過好多名人, 都係孝順仔一名, 唔知點解, 雖然唔係必要條件, 但應該係基本條件!

櫻井的二三事

生於憂患

未正式接手酒藏時候, 櫻井自己有盤石礦生意, 上緊軌道, 係賺錢生意. 反而當時櫻井酒場 (即旭酒造, 獺祭前身) 面對斷崖式既困景. 櫻井同佢老爸關係唔算太好, 雖然佢無講明, 但多數因為係屋企關係問題. 到佢老爸離開時候, 面對接手問題, 其實佢可以輕鬆放棄, 繼續做自己生意便可. 但最後, 佢選擇繼承酒造. 理由正如佢自己講, “如果不繼承酒藏, 一定會後悔一軰子, 覺得有所遺憾. 當然希望靠自己重振酒藏, 讓父親看看我的厲害”.

哩句說話, 表面上會覺得櫻井牙刷刷, 意氣說話, 但諗深一層, 唔係孝順既人, 唔會咁諗. 佢義無反顧接手爛攤子, 根本係唔捨得老父既留低既野. 另外, 作為子女, 能夠回報父母既, 除咗物質, 就係盡力將自己發揮到極點, 唔好白白浪費父母既心血. 從哩個角睇櫻井, 實在令人動容.

危機就是轉機

“父親五十歲起, 每天只出席酒藏的朝會, 之後什麼工作都不做. 我今年六十三, 仍然從早工作到晚, 一有差錯, 還可能工作到深夜, 為什麼我們的差別這麼大呢?”

櫻井哩句說句, 有幾個層面. 第一就係反映當時全個清酒行業既衰落. 70年代Sake銷量去到頂峰, 但其後漸漸變咗老人家玩意. 後生一代, 跟上世界潮流, 迷戀新products, 例如威士忌, 啤酒, 甚至乎興起既燒酎. Sake呢? 停留係黐黐立立, 飲完會頭暈爆裂既階段. 櫻井講, “員工卻也認為只要每天重複相同事情, 就能得過且過地度過每一天.” 全個旭酒造, 甚至乎整個業界, 根本無解決方案. 咁既狀況, 經營壓力好大, 櫻井要調動石材公司既錢, 去支持酒造既營運.

第二個層面, 反映佢係一個非常勤力既人. 櫻井意識到, 再唔作出改變, 酒造遲早玩完. 佢好驚訝, “公司內卻絲毫感覺不到任何緊張情緒”. 所以佢要投入百份之百既時間, 要努力, 諗吓其它可行方法, 絕地求生.

獺祭曾經開拓啤酒市場, 在地亦開咗間餐廳, 希望增加收入來源, 但唔到三個月, 就陷入咗困局. 面前只有兩條路可揀, 一係繼續投放資金, 一係止蝕. 櫻井覺得, 情況如果繼續惡化, 就會將全間獺祭都會輸埋, 員工會失業. 而止蝕, 獺祭還可以應付, 但已經重傷. 銀行因為咁, 調低咗信貸評級, 攪到現金流好緊拙. 櫻井甚至要將自己份壽險都壓上, 應付現金流.

衰野一不離二, 哩個時候, 杜氏 (酒藏既主釀酒師) 因為睇唔到獺祭既前景, 拉咗成個團隊走人. 最需要支持既時候, 被人離棄, 好多時係現實生活發生. 櫻井原本計劃生產一啲高質素既酒, 一時間, 真係束手無策, 全個酒造, 根本無人識得做. 等於一間酒樓無大廚, 基本上可以拉閘.

Every cloud has a silver lining. 櫻井證明自己係能人. 獺祭無杜氏, 佢就自己充當杜氏, 帶著一班毫無釀酒經驗既員工, 頂梗上. 咁反而有好處, 杜氏同埋藏人, 關係就係師父徒弟, 受到封建制度影響, 無人夠膽以下犯上. 創新? 會面對好多掣肘. 無杜氏, 就可以隨心所欲, 真正創造一款高質素既酒 – 獺祭. 櫻井經常講, 一款令人感覺到幸福既酒. 製作理念, 永遠以客人口味為先. 當然, 事後我地知道櫻井係成功. 但當中壓力, 唔係普通人可以承受到. 佢話, “白天為了資金運作而煩惱, 晚上則進入酒藏, 時常在酒藏內一邊傾聽酒醪的聲音, 一邊迎接黎明的到來”! 成功既人, 就係有哩種熱情, 能耐, 認真. 連床都唔瞓, 就挨係酒桶隔離. 正如佢自己再講, ”那時候連公司能不能存活下來都不知道”, 人去到絕景既時候, 就要用一切努力搵出路. 最後, 上天總會動容, 連魔鬼也會哭泣 (鬼の目にも涙).