角瓶故事: 一代日威傳奇誕生
角瓶故事: 一代日威傳奇誕生
最近有個同學 (Vicky) 問，日本邊度可以買到無年份既基本版日本威士忌 ? 我唔識答。日本年份威士忌已經下架多年，眾所周知。箇中原因係畀啲遊客胡亂搶購，當手信咁掃貨，遺憾包括我在內，導致供不應求，原酒庫存大跌，酒廠唯有下此一著。 就連基本版，亦係各大日本超市酒舖，全部消失。
我記得多年前，係名古屋買咗支 余市 12年，大概六千幾日圓，返香港送咗畀個酒友，點知唔夠一星期，日威就宣布下架。價錢其後當然三級跳了，我的確有啲後悔，哈哈......
最近睇過有啲 YouTuber 介紹，話基本版日威可以係當地超市，酒舖搵到，但我自己行過好多間，連影都無隻。最近係網上 check 過，香港有啲酒舖都有，但以現時低迷既日元匯率計算，相對昂貴，價錢仲高過啲蘇格蘭既 core profiles，而且只有 standard size，無 half bottle，200ml 版本，唔夠 flexible。
我問 Vicky 點解對日威有興趣。佢話上堂只係飲蘇格蘭威士忌，平時聽得多日本威士忌有幾威，但有年份太貴，所以想試試 NAS (No Age Statement，即係無年份既產品)。
既然 NAS 唔易搵，我索性叫 Vicky 試試 Suntory 三得利支經典 – “角瓶”。
____________________________________________________
“角瓶” 就是響嗎?
____________________________________________________
Suntory 當然唔會陌生，入到超市，就見到好多佢既產品，尤其啤酒。而最令人震撼，當然係佢支 -- “響”，自千禧後，好多年份都獲獎無數，將日威推向國際舞台既巔峰。其它 產品仲有耳熟能詳既 – “山崎” 同 ”白州”，一樣橫掃各大獎項。講起山崎，山崎蒸餾所係個唔錯既景點，非常方便，係京都隔離，可以平價試到啖 ”響 30”。
“山崎”， “白州”，哩兩支威士忌，依照蘇格蘭 regulations 分類，屬於單一麥芽威士忌 Single Malt Whisky，原材料係發芽大麥. 三得利仲有一個品牌較少人識，叫 ”知多”，屬於單一穀物威士忌 Single Grain Whisky，原材料除咗大麥，亦可以混合其它穀物，而知多選用美國同加拿大既粟米。至於”響”，屬於所謂調和威士忌 Blended Whisky，原酒混合 Single Malt 同 Single Grain Whisky，順理成章，“響”既原酒就係取材自 ”山崎”，“白州” 同 ”知多”。
點解介紹 Vicky 飲 ”角瓶”，原因係 ”角瓶” 所採用既原酒同 ”響” 一樣，同樣係調和式威士忌，飲 ”角瓶” ，理論上就等於飲咗 ”山崎”，“白州”，同 ”知多” 既 NAS，而且配方同 ”響” 相似，諗諗吓，即係飲咗平價版既 ”響”，哈哈…
____________________________________________________
前傳 – 經典的孕育
____________________________________________________
唔係好多酒廠有傳奇酒，因為好多酒廠本身就唔係傳奇。成為傳奇酒，當然有歷史因素，背後使命。如果一支酒能夠係歷史洪流，創做兩次奇跡，咁又應該點形容好呢?
三得利創辦人鳥井信治郎，係1920 年代開始計劃生產日本本土威士忌既夢想。 1923年，選址京都附近既山崎，創建日本第一座蒸餾所。鳥井雖然釀葡萄酒好叻，1907年已經自行釀做第一支 Port，叫赤玉，但講到威士忌，佢並唔係專長。當時全日本無一個人真正識釀威士忌，除咗一個人 -- 竹鶴政孝，日本威士忌之父。竹鶴夢想一樣，為咗釀造本土威士忌，親身負芨去到威士忌之鄉蘇格蘭，拍門學藝。係同行引薦下，鳥井搵到竹鶴，兩大巨頭合作，一齊研發。
成功背後，就係磨難。1929年，第一支日本威士忌終於誕生，叫 ”白札”，廣告 slogan 寫著 – “不需要外國貨了 ! ” 原本諗住平地一聲雷，但結果係不受歡迎。箇中原因，竹鶴承傳外國技術，原本理念係打做一支蘇格蘭風格既威士忌，有木桶，煙燻，甚至泥煤炭味，但係對於日本人嚟講，佢地從來無哩類味覺經驗，而且鍾意偏向甘口，失敗可以理解。
做威士忌成本唔輕，加上要長時間熟成，現金流轉得好慢。 “白札” 雖然失敗，但三得利並無放棄，繼續研發。執著往往係成功充份條件，但並非必然，鳥井要將整間公司命運押注，哩種性格，可能係關西人獨有特質，或者係甚至係歷史人物既特質。1931年，三得利連買材料既錢都欠奉，所以酒廠入面，並無1931年哩個批次。 其後，更加要將賺錢既業務出售，補貼釀造威士忌既開支，包括 Sumoka 牙膏事業，同埋橫濱啤酒廠，更重要係關鍵人物竹鶴離開三得利，自立門戶。
____________________________________________________
要麼就是成功，失敗是沒有餘地的 -- 經典降世
____________________________________________________
經過近 10 年反覆嘗試，終於係1937，新品終於再面世，哩支就係 ”角瓶”。迎合日本人口味，無 heavy 泥煤煙燻味，反而突出花果甜香。推出市場後，大受好評，結果三得利獲得空前既成功，轉虧為盈，將事業推向另一個高峰。
“角瓶” 原版並唔係叫 ”角瓶”，而係叫 Suntory 威士忌 12 年。因為長方型，四四方方，所以業界叫 ”角瓶”。大概 1950 年以後，順應民意，樽頸位置開始貼上 Kakubin，“角瓶” 正式命名。樽身有好多坑紋，據三得利自己描述，似龜甲花紋，外觀靈感嚟自高檔次既清酒酒杯 -- 切子，喻意龜齡萬年。
____________________________________________________
又是你麼? 角瓶 -- 傳奇再現
____________________________________________________
角瓶面世後，三得利陸陸續續推出單一麥芽威士忌。例如 1984 年首推 ”山崎 12 年”，1994年 ”白州 12 年”。千禧後各款日本單一麥芽威士忌係國際舞台屢獲大獎，加上市場 傾向覺得單一麥芽先係好野，“角瓶” 漸漸被人忽視，睇少，甚至遺忘。
十幾廿年前日威未成什麼氣候，加上上世紀 90 年代經濟泡沫爆破，經濟下滑，長年未見起色，當然涉及本土餐飲業，甚至威士忌市場。最佳例子，就係現今業界 one of the most sought after 既工藝酒廠威士忌 – “輕井澤”，敵唔過時代洪流而要關廠。巨頭三得利亦一樣，感受到巨大壓力。苦無對策下，2008年，三得利嘗試推推威士忌兌蘇打水作為行銷策略。仔細啲講，係用 ”角瓶” 威士忌加蘇打水，所以亦叫角瓶 Highball。Highball 並唔係啲咩新玩意，早就存在，所以基本上唔存在什麼期望。唔知 ”角瓶” 係咪三得利既吉祥物，哩種簡單玩意，居然係一眾居酒屋，餐廳大受好評，引起一股 Highball 熱潮，慢慢更加普及全國，一般市民大眾，除咗出街飲，亦會係屋企自製 Highball。
“角瓶” 充當今次主角，將日威產業一洗頽氣，將三得利業務重拾正軌。往後三得利更推出一啲新品，現成既角瓶 Highball。傳奇唔多，一次已經不得了，隔咗超過半個世紀，再 一次成為傳奇。屈指一算，可能只有佢 – “角瓶” Kakubin。原來一直都係大眾身邊。
____________________________________________________
自製角瓶 Highball
____________________________________________________
之前有同學問過我，夏天飲咩酒好 ? 夏天當然飲又凍又 fresh 既野。Options 當然有好多，我曾經推介過俾同學，什麼 Prosecco cocktail，White Zinfandel Fruit Punch，今日講到 ”角瓶”，所以就推介 Highball。
有 Highball 杯最好，其實直身杯就 OK。先將冰放入杯，冰鎮隻杯一陣。然後將融咗既水份倒出，以免一開始就 dilute 威士忌啲味道。將 1個 shot，即 30ml 威士忌倒入杯，然後加入 sparkling water。但要謹記兩點，一避免直接撞落冰塊，二要慢，減少氣泡過快散失。用棒輕攪便可。鍾意既話，可加入檸檬汁，但不要太多，以免嗆味，或放入檸檬片，甚至薄荷葉，増加清爽感，悉隨專便。
另一類做法，叫無冰 Highball，或者正統啲，叫神戶式 Highball，顧名思義，哩種飲法係神戶一帶流行。杯先雪凍，威士忌亦要雪凍，倒入杯中，再加凍 sparkling water，就係咁簡單。神戶式好處係唔會 dilute，一入口就透心涼，但同以上傳統方法相比，欠缺咗啲啲變化。
其實 Highball 唔需要指定威士忌品種，理論上，任何威士忌都得。有錢既，癲到搵支 ”響 30” 調整亦可以 ! 但普遍都係揀啲 Blended Whisky，調和式威士忌去做，因為價錢比 Single Malt 平。始終，Highball 都係 for easy drinking。
角瓶雖然係正宗，但根據日本威士忌網紅 Crossroad Lab 問卷調查，最高票數，用嚟做 Highball 既威士忌係日果既 Nikka from the Barrel，第二位，居然係生蠔之寶 Talisker10，角瓶只係排第 9，哈哈......
“角瓶” 會唔會創造第三次傳奇，唔知。但日本威士忌發展史，非常多故事，有機會再另文講吓。