Bordeaux En Primeur 暴漲與崩盤

Bordeaux En Primeur

暴漲與崩盤, 是離不開的拍檔

一到四月五月, 上堂難免會講吓波爾多期酒-En Primeur哩個話題, 因為嗰邊啱啱攪緊.  最近email彈晒啲報價出嚟, 仲熱門過股市.  Level 2, 3課程入面無哩個topic, 但有同學會主動問.  哩種態度幾正確, 讀酒要貼地, 主動緊貼市場好重要. 大部份既葡萄酒課程, 主要係教做酒既理論, 其實幾boring, 反而市場既野, 好少涉及. 對於好多人嚟講, 感覺有啲離地. 出到去同人吃喝玩樂, 無咩人有興趣知道, 支酒係點生產, 一講就覺得沒趣! 我見過有Level 4既同學, 連61莊都唔係好清楚係咩, 同人講波爾多, 完全搭唔到咀!

波爾多期酒市場

期酒活動, 其實歷史追索到18世紀, 反映波爾多人一早已經有高超財技, 玩期貨, 增加現金流. 好多人覺得係近代玩意, 哩種誤解, 係因為今時今日期酒定價, 會同酒評家啲分數掛勾.  而評分系統, 當然係近代既事.

以前期貨點定價? 由經紀決定. 通常期貨分三批次出價, 第一次定價試市場水溫. 反應好, 第二次就會加價. 再好呢? 仲使講, 梗係開天價啦. 哩種方法, 香港人應該好熟識, 好似新樓盤推銷一樣, 玩唧牙膏, 越唧越高, 仲可以加埋啲內鬼搭棚, 推高價格!

今時今日, 定價會參考酒評家意見. 佢哋會試啲新酒, 然後評分. 基本上, 定價會同分數成正惢.  所謂新酒, 就係啲舊年harvest, 仲係木桶入面ageing緊既酒, 抽啲sample出嚟俾人試吓. 依啲酒, 真真正正可以評為Level 3 Readiness既too young. 我經常建議同學試試哩啲期酒, 點解? 試過就知道點解上堂無too young既酒哩回事喇. 

恐怖的自由落體

講返今年期貨, 打頭陣係武當Mouton, 同大金鐘Angélus, 第一批次價格, 比2022年, 急跌分別30%同25%.  拉菲Lafite如何? 挫31.7%!  Super Second Las Cases雄獅仲悲, 物理學所謂既自由落體發生係佢身上, 急插40%!  其它名莊例如Pontet-Canet, 都跌27%.

暴跌真相

期酒定價, 真係完全根據分數訂定? 又唔一定, 2023 Mouton俾Decanter評為potential 100-point wine, 理論上滿分, 估計價最悲都係平開, 點解又跌, 唔通2022年110分咩? 哈哈…

今年暴跌原因, 根據分析其中主因, 係因為2022年價暴升, 價格係個天而已. 今年定價落返凡間, 感覺就好似崩盤一樣.  以Las Cases雄獅為例, 其實今年價同其它年份比較, 唔見得特別平.  偶像級酒評家Neal Martin今年俾96分, 而2015年, 評97分, 理論上2015年價錢應該高啲, 但原來差不多.  2019年, 又係97分, 但係定價, 今年比2019更高! 玩反比.

另一個原因, 係2022年太貴, 導致全年既二手市場呆呆滯滯, 所以今年出手定價, 就保守好多. 正如有啲酒莊講, 價錢平啲, 想挽救返市場既信心@@ 

考試題目

Level 4既考試題目, 以前曾經出過, Bordeaux En Primeur既好處同壞處.  哩條題目都幾困難, 對於既業界同學, 尤其做trade嗰唣, 當然有優勢, 但對wine lover學生, 當然頭都大埋. 我睇返啲Examiner Report, 多數負評, 大部份人都唔及格.  炒期貨, 其中一個最切實既問題, 就係滙價風險.  滙價高既時候買入期貨, 當然面對好大滙率下跌風險. 尤其依家息口咁高, 市場原本一面倒預期減息, 點知上星期聯儲局又話有機會加息, 放鷹, 攪到股市, 滙市, 應聲下挫.

其它壞處, 當然包括成條食物鏈既分莊.  好景時候, 個個中間人肥到褲都著唔落, 攪到啲wine maker眼紅. 為咗增加利潤, 老羞成怒, 索性加價自肥. 但加咗價, 中間人未必咁易推高個零售價, 自然又無啖好食. 所以久而久之, 攪到啲中間人無心機做波爾多酒, 無人推, 又自然滯銷, 成個market食咗慒仔丸咁. 睇返近年Bordeaux酒, 的而且確有啲咁既現象.

我哎呀契爺, 係城中巨賈. 佢曾經講過一個做生意既智慧, 好受用. 佢話, “係搵到錢既時候呢, 你要留低啲係抬面俾人攞, 咁樣呢, 人家先會繼續同你做生意”. 有時我會用潮州白話, 學吓佢講野, 然後自己會係度: 嘻嘻嘻…