🍹King's Sir 品酒教室 - Cocktails 需要你🍸

「憂鬱嘅眼神,唏噓嘅鬚根,神乎奇技嘅刀法,同埋嗰杯 Dry Martini🍸,都徹底咁嘅將你出賣咗。 」當 King’s Sir 仲係小朋友嘅時候已經係一位資深「星迷」⭐️,非常中意星爺嘅作品,而《國產凌凌漆》更係星爺致敬「特務007占士邦」嘅電影。當年仲係小朋友嘅 King’s Sir 一直以為 Dry Martini 係雪碧上面加一粒提子🍇,到大個先知原來 Dry Martini 係一款雞尾酒 (Cocktail)。King’s Sir 今日同大家分享呢件童年往事,正正因為 King’s Sir 今日將會同大家一齊探索雞尾酒嘅世界🔍,各位雞尾酒新手記得要專心睇埋落去啦~
起源:雞尾酒 (Cocktail)
時至今日,大家對雞尾酒嘅由來都議論紛紛,而 King’s Sir 會同大家介紹雞尾酒其中一個最早期嘅由來。1776年,美國正在處於獨立戰爭時期,紐約州埃爾姆斯福有一間以🐓雞尾羽毛做裝飾嘅酒館。有一日,酒館嘅酒水都幾乎賣清光,然後有一班美國軍官大駕光臨酒館。有一位叫貝特西·弗拉納根嘅女侍應將所有剩底嘅酒都倒埋一齊,然後隨手拎左條雞毛進行攪拌。軍官憑酒色同味道都未能分辨到係邊一種酒,於是就詢問女侍應,貝特西就隨口回答:「呢杯係雞尾酒!」,然後成班軍官都好高興咁舉杯慶祝並大叫:「雞尾酒萬歲🍹!」。呢一個故事被大部分美州人認可,成為左屬於美州嘅雞尾酒起源。
當 King’s Sir 知道左呢一個雞尾酒起源後覺得好好彩,因為今時今日大部分雞尾酒唔會採用雞尾羽毛攪酒同當作裝飾,如果唔係我肯定飲唔落😣。另外,為左令各位酒友同朋友出街飲嘢嘅時候都可以多啲選擇,唔洗淨係識叫一兩款雞尾酒,又或者可以令大家足不出戶都飲到雞尾酒,跟住落黎就會同大家介紹五款熱門雞尾酒以及各自誕生嘅故事同調製方法。
1. 乾馬丁尼 (Dry Martini)
人稱雞尾酒之王 Dry Martini 🍸嘅由來都唔少,其中之一嘅由來源於1863年,三藩市一間 Occidental Hotel🏨出品左一款名叫 Martinez 嘅雞尾酒,有好多客人飲完 Martinez 就會乘坐小船到另一個名叫 Martinez 嘅小鎮,而當地居民就擅作主張並對外宣稱 Martinez 係由小鎮嘅調酒師研發出黎,後來不斷改良而變成左今日嘅 Martini。另外,電影大銀幕上都可以見到Martini 嘅身影🍸,例如《國產凌凌漆》& 占士邦007系列電影等等。
調製方法:
i.材料
氈酒 --- 60ml
不甜香艾酒 Dry Vermouth --- 10ml
橄欖或檸檬 --- 1粒或1片 (裝飾用)
ii.步驟
1. 將冰塊及 50ml 的琴酒和 10ml 的苦艾酒倒進調杯中攪勻
2. 將酒濾冰,並倒進已經冰鎮過的酒杯中
3. 將橄欖或檸檬放進杯中作裝飾便完成
    2. 莫吉托 (Mojito)
    我諗除左Dry Martini 之外,依家爆紅嘅雞尾酒非 Mojito 莫屬,只要周杰倫嘅《Mojito》旋律一起🎶,大家都會至少唱到一兩句歌詞。其實 Mojito 嘅前身名叫 El Draque,最初由一位英國爵士 Sir Francis Drake 係航海嘅時候發現⛵️,當時爵士嘅士兵同水手都患上痢疾同壞血病,係苦無醫療資源下,爵士獲得古巴原住民幫助,利用薄荷、萊姆檸檬、甘蔗糖、chuchuhuasi 樹皮並以萊姆酒為基酒調製左一款具有醫療功效嘅調酒去醫治患者,呢杯調酒正正就係 Mojito 嘅初型。Mojito 係非洲語同西班牙語嘅結合,Mojo 非洲語係「神奇、有吸引力」嘅意思,而西班牙語喜歡將字尾最後一個母音除去,改成-ito,從而變成「有啲可愛」嘅意思 ,而 mojito 呢個名詞就混合左兩種語文嘅元素係入面。
    調製方法:
    i.材料
    古巴白蘭姆酒 --- 40ml
    新鮮青檸汁 --- 30ml
    薄荷葉 --- 6片
    白糖--- 2茶匙
    蘇打水
    ii.步驟
    1. 首先要將薄荷葉與白糖、青檸汁混合倒入杯中搗碎
    2. 加入白朗姆酒,再加入一些蘇打水和冰塊直至滿杯
    3. 最後以薄荷葉或檸檬片裝飾
      3. 螺絲起子/螺絲批 (Screwdriver)
      當King’s Sir 第一次見到呢款雞尾酒酒名嘅時候真係覺得好有趣,好想試下係酒吧同酒保講:「要一杯螺絲批🪛。」但其實呢一杯雞尾酒真係同螺絲批有關係。好耐之前,有一個係伊朗油田工作嘅美國工人,佢係偷懶嘅時候想飲酒放鬆,於是將伏特加倒入罐裝橙汁入面,然後用螺絲批進行攪拌,而史上第一杯螺絲批雞尾酒正式誕生。
      調製方法:
      i.材料
      伏特加 --- 50ml
      橙汁 --- 100ml
      ii.步驟
      1. 將所有材料倒入杯中並加入冰塊
      2. 攪拌均勻後加上裝飾物即可飲用
      4. 咖啡馬丁尼 (Espresso Martini)
      返工咁悶,想飲酒而又唔想老闆知道?咁 Espresso Martini 就fit晒你,外表同普通 Espresso 一樣,但其實係一杯雞尾酒,可以醒腦提神之餘,仲可以舒緩酒癮。 Espresso Martini 由近代調酒大師 Dick Bradsell 於1983年發明。據說當時,有一位年輕女模特兒要求 Dick Bradsell 調製一杯能夠醒腦提神,但又可以一飲即醉嘅雞尾酒。當時,Dick Bradsell 將濃縮咖啡同伏特加結合,再額外添加兩種咖啡利口酒同糖漿黎調整風味,因此 Vodka Espresso 就此誕生。後來因為90年代馬丁尼杯盛行🍸,Dick Bradsell 為左跟上潮流而稍微改良配方,然後將 Vodka Espresso 更改為今日嘅 Espresso Martini。
      調製方法:
      i.材料
      伏特加 --- 35ml
      咖啡香甜酒 --- 20ml
      現煮濃縮咖啡 --- 30ml
      ii.步驟
      1. 冰鎮淺碟香檳杯
      2. Cocktail Shaker加入所有材料及冰塊,搖盪均勻
      3. 過濾冰塊,將酒液倒入冰鎮過的淺碟香檳杯,加入咖啡豆作裝飾用途
        5. 粉紅佳人 (Pink Lady)
        最後一杯要登場嘅雞尾酒係粉紅佳人 Pink Lady ,請大家唔好搞錯,係雞尾酒「粉紅佳人」而唔係美國愛情喜劇「紅粉佳人」📺,事關 King’s Sir 聽到酒名嘅時候覺得好熟悉而搞錯左。於1912年,英國倫敦上演左一套叫《粉紅色的女士》短劇,首場演出結束後嘅慶祝會上,調酒師為女主角海澤爾•多思創作左第一杯粉紅佳人雞尾酒。隨後於1944年美國百老匯《生日快樂》短劇中,女演員海倫•黑斯飲左粉紅佳人後,就係舞台上大展舞姿💃🏽,經媒體宣揚後,從而令粉紅佳人雞尾酒風靡世界。桃紅酒色嘅外表,加上味道口感,好快令粉紅佳人成為眾多女性嘅選擇。
        調製方法:
        I.材料
        琴酒 --- 45 ml
        檸檬汁 --- 15 ml
        蛋白 --- 30 ml
        紅石榴糖漿 ---15 ml
        ii.步驟
        1. 冰鎮馬丁尼杯
        2.Cocktail Shaker加入所有材料及冰塊,搖盪均勻
        3. 濾掉冰塊,將酒液倒入冰鎮過的馬丁尼杯
          今個月King’s Sir 就同大家分享左雞尾酒嘅起源、五款熱門雞尾酒誕生嘅故事,以及調製過程,想知道下個月King’s Sir 品酒教室有咩分享,就記得緊貼住King’s Wine Cellar 嘅FB、IG & 網站啦!